رسالة للسيد الرئيس

بسم الله الرحمن ارحيم

السيد رئيس بلدنا الحبيبة مصر أم الدنيا

السلام عليكم و رحمة الله و بركاته ...

أما بعد

مش عارف أبدأ من فين لأن بصراحة فيه حاجات كتيرة ممكن نبتدى منها , بس الحقيقة أنا عايز أبدأ من يوم المنصة ,

 فاكره ياريس

ليه يوم المنصة ؟؟ أقولك أنا ليه

يوم المنصة كان يوم الذكرى الغالية على قلب كل مصرى

يوم المنصة كانت أيام المجد اللى صنعها جيش و شعب

يوم المنصة يوم إستشهاد قائد و رجل مصر اللى عاش و مات من أجل مصر

فى اليوم ده كان فى المنصة خيرة رجال مصر و إنت كنت بينهم

يوم المنصة كان أولاد مصر يستعرضون أمام قائدهم العظيم فى يوم فرحتهم الكبيرة

يوم المنصة كان يوم الحزن على مصر كلها لغاية اليوم

بس عايز الحق يا ريس مصر كانت كبيرة بولادها اللى ما إنجروش فى الفتنة

عارف ليه ياريس لأن المصريين بطبيعتهم كبار و مش من السهل يتغشوا فى فتنة من أى نوع

المهم يوم المنصة ده كان نقطة تحول فى تاريخ مصر ياريس و إنت عارف طبعا يعنى إيه نقطة تحول

بسبب يوم المنصة تم تنصيبك علينا ريس و كنا متفاءلين بيك جدا

عارف ليه ؟؟؟ من أسلوبك فى الكلام

كنا بنحس إنك مصرى بجد مننا

كنت أحيانا أشعر بالصياعة الحلوة فى أسلوبك فى الكلام

كأنك فتوة من فتوات نجيب محفوظ اللى بيحبوا الحق و يدافعوا عن الشرف و العرض 

و مصر بصراحة كانت محتاجة ريس صايع و فتوة و إبن بلد

مصر مش كانت محتاجة إبن باشا أو سياسى من الحرس القديم

مصر كانت عايزة واحد شباب زيك يا ريس 

كنت بتلقى تصريحاتك و كأنك واحد من أولاد الشوارع علشان كده كنت فرحان بيك جدا و قلت فى نفسى الله يرحمه السادات عرف يختار

بغض النظر من النكت اللى كانت بتتقال عليك فى الوقت ده بس بصراحة كنت إنت الأمل لكل المصريين

يا ريس مصرنا الحبيبة أنا عايز أسألك سؤال

إيه اللى غيرك

إيه اللى غير البطل اللى كنا بنحبه و الفتوة اللى كنا بنشوفه فى روايات محفوظ كنا بنشوفه فيك

و الله إحنا بنحبك و الله يشهد إننا عمرنا ما كرهناك أبدا و إن كنا مش عاجبنا كثيرمن تصرفاتك

بس عايز الحق

النهاردة قريت خبر عن عملية الصواريخ جيتس الإسرائيلية و إزاى مصر عرفت تغزو إسرائيل و ده طبعا مش ممكن كان يحصل لو إنت مش حسنى مبارك بطل القوات الجوية فى رمضان المجيد

و الله لقيت نفسى بأحبك من جديد أكثر من الأول

و لقيت نفسى بأفتح لك قلبى و يمكن تسمع منى اللى ما سمعتوش من ناس تانية لا فى الحزب الوطنى و لا حتى المعارضة

لقيت نفسى عايز أقول لك إرجع لنا يا بطل إرجع لشعبك اللى حبك و إنت بطل

إرجع لنا يامصرى و إرجع لشعبك اللى مجدك

إرجع لنا يا فتوة ياللى حترفع الظلم عن ولادك

إرجع لنا يا ريس علشان نرجع أيامنا الحلوة بيك

من غيرك صدقنى ما فيش أمل لكل الأمة العربية

إرجع لبلدك اللى بتحب الرجولة و الشهامة و سيبك من شوية الناس اللى حواليك اللى إنت عارف إن أكثرهم مضلين

إرجع لمصر و ماتخليش فرصة للعالم تتشمت فينا

و بعدين زعلت منك تانى ياريس  ... عارف ليه ؟؟؟

لأنى قريت خبر إعتداء رجالتك على بنات مدرسة العبور فى المعادى بسبب إحتجاجهم على سكن السفير الإسرائيل جنب مدرستهم

شفت ياريس السفير السفيه إختار سكنه فين ؟؟؟

جنب مدرسة - مش مهم - و لكن مدرسة و إسمها العبور

ليه يا ريس تدو له فرصة يسخر من رمزنا

يسخر من رمزك

يسخر من يوم إنت شاركت فى صناعته مع إخوانك الأبطال و أولادك الشجعان

يوم كان الدم المصرى فيه هو النور و الحافز على النصر و العبور

يوم تحطيم الأسطورة المرعبة للجيش الذى لا يقهر

مدرسة العبور دى بتدل على عبورك يا ريس

ريسنا و حبيبنا إفتح قلبك لشعبك و إنزل لهم من تانى من غير حرس و من غير أمن مركزى و أقسم لك إن مصر بشعبها حيكون لك دروع بشرية ضد أعداءك

عارف ليه يا ريس ؟؟؟؟؟؟؟؟؟

لأن ساعتها عدوك هو عدونا و مش ممكن فيه مصرى يرضى لك بالألم مدام إنت وسطهم

و تهون أرواحنا كلها فداك لو ترجع لنا تانى حسنى مبارك اللى بنحبه من غيرأغانى مفروضة و من غير أشعار مكتوبة مكذوبة و من غير نفاق و من غير شلة من المحسوبين

سيادة الرئيس محمد حسنى مبارك رئيس جمهورية مصر العربية بطل القوات الجوية إبن الموفية البار

أنا عارف ممكن تقول كتبت لك الرسالة دى فى ساعة من ساعات التوهان

لكن لا و الله كتبت لك الرسالة دى فى ساعة من ساعات الصفا لأنه يصعب عليا إنك تصيبك لعنة الجبارين

يا حبيبنا و إبن مصر إذا دعتك قدرتك على ظلم الناس فتذكر قدرة الله عليك

أتمنى أن أسمع أخبار تسرنا كلنا

يا ريس لا أمريكا و لا إسرائيل حيقفوا معاك عند العزيز القهار يوم ما يسألك عن الناس اللى ماتوا فى عهدك جوعا و غرقا

يا ريس لا أمريكا و لا إسرائيل حيساندوك يوم ما أسرع الحسابين يسألك عن الناس اللى بتنام على الأرصفة و إنت نايم فى القصور

ده حتى المفتى مش حيشهد لك فى اليوم ده و أكيد حيكون شاهد عليك عارف ليه ياريس؟؟؟

لأنه فى اليوم ده يفر المرء من أمه و أبيه وكل الناس بيفروا

إلا أصحاب المظالم حتلاقيهم و اقفين لك على الطريق كل ما تفكر فى الجنة حتلاقيهم قافلين الطريق حتى ترد لهم مظالمهم

و ساعتها من فين يا حسرة ؟؟ ماهو فى اليوم ده الدولار ما لوش سعر و الذهب ما حدش عايزه و البقر ما عادش بيحلب

يا ريس و لا حتى الزعماء العرب من المحيط إلى الخليج حيمدوا لك إيديهم يوم ما يسألك قاهر الملوك و الجبابرة عما فعلت بالأمانة

شعبك أمانة بلدك أمانة رسالتى إليك أمانة

و الله أسأل أن يعود إلينا محمد حسنى مبارك الرئيس المحبوب ليقضى على المخدرات و المعاصى التى ترتكب على أرض الوطن

و نكون كلنا إيديك فى القضاء على الفتن  

إبنك و أخوك اللى بيحبك

محمود